William Rowe 1668-1709

Genesis III

1. Lebben an hagar-breeve o mouy foulze vell onen vethell an Bestaz an gweale a reege an Arleth Deew Geele; Ha e a lavarraze tha an Vennen, Eah! Reeg Deew lawle, Che na raze debre a kenevrah gwethan an Looar?
2. Ha an venen a lavarraz tha an hagar-breeve, ni a ell debre a thore oll an gweth an loar.
3. Boz thort an gwethan a ez en crease an Loar, Deew a lavarraz why nara debre anethe na narewa e thotcha, lez why a varaw.
4. Ha an hagar-breeve a lavarraz than Vennen, why nara seere merwall.
5. Rag Deew a ore, a en jorna ah ero debre nothe, nena agoz Lagagow ra bos geres; ha why ra boaze pocara deew a cothaz Da ha Droag
6. Pereege a Vennin gwellas tro an wethan da rag booze, ha derohi blonk than Lagagow ha gwethan tha voaze desyryes tha gwelle onen feere; Hi a gomeras radn an Haze anethe ha reege debre; ha a rowze radn the e Goore goshe, hag e reege debre.
7. Ha lagagow an gie ve gerres ha an gie oyah teler an gie en noath; ha an gye a wrivas Delkyow Figgez warbarth, ha wraze tho an gye aprodnieo.
8. Ha angye a glowhas leaufe a Arleth Deew a kerras en Looar en yeindre an Deeth, ha Adam ha e wreege a geeth tha govah thort deraage an Arleth Deew amisk an gweeth an Looar.
9. Ha an Arleth Deew agerias tha Adam ha lavarraz thotha peleha estha?
10. Ha e lavarraz, Ve a glowhas leave en loohar; ha me vee owne, rag theren en noath, me geath tha govah.
11. Ha e a gowsas, preg laule theeze tellestah en noath? Aresta debre thort an Gwethan a reeg a vee laule theeeze a na wresta debre?
12. Ha an Deana gowzas, an venin aresta ry dha ve, hy a rose tha ve thor an wethan ha ve reeg debre.
13. Ha an Arleth Deew a gowzas tha an venen, pandrew hemma a eze gwraeze geneze?ha venen a worebaz; An hagar-breeve a thullas ve ha ve reeg debre.
14. Ha an Arleth Deew a lavarras tha an hagar-breeve Drefen chee tha weele hemma tho chee molithes a dres ol an chattel, ha derez kenefra bestaz an gweal; war tha doar chee ra moaze, ha douste chee ra debre oll deethyow tha vownyas.
15. Ha ve vedn goerah zoer treeth chy, ha an vennen, ha treeth an haaze chee, ha e haaze hie; E ra brewi tha pedn, ha chee ra brewi e gwewan.
16. Tha an venen e cowzas, Me vedn meare cressha tha dewhan, ha tha humthan; en dewhan chee ra dooone flehas; ha tha dezeria ra boaze tha goore, ha E ra tha rowlia.
17. Ha tha Adam E gowzas dreffen chee tha gazowaz the tallah the wreege, ha reege debre thor an wethan, a reeg a vee lawle chee na raaze debre anothe; Cushez yw an nore rag the crengah; gen Dewan chee ra debre notha oll deethyow tha vownyaz.
18. Spearn ha askal ra e dry theeze, ha chee ra debre an lozo an gweale.
19. En wheeze tha godna talle che ra debre the vara, tereba chee tha traylya tha noar; Rag a vesta che ve comereze; rag douste eze, ha tha douste che ra traylyah.
20. Ha Adam a gryaze hanaw e wreege Eva dreffen o hye damah a oll bewjah,
21. Ha tha Adam ha e wreeg a reeg an Arleth Deew geele bowse crohan, ha ez goreraz.
22. Ha an Arleth Deew reeg lawle, meroyow; An dean yw devethez pocara ha onen a nye, da othaz dha ha drog. Ha leben lez E ora raage ha komeraz a weeth dore an gwethan bownaz, ha debre, ha bewa rag nevra.
23. Rag hedda Arleth Deew devenas Eve a rage thor thor paraves, tha gonez an noare, thor neb veva comeres. 24. Della E a hellaz meaze an Dean; ha E oraze tha East a baraves Elze neeve, ha Cletha Tane reg traylya kenefra Vor, tha gweetha an Vor an Gwethan Vownyaz. An Duah an dridga chaptra a Genisis.